ஸ்காண்டிநேவியக் கொலைகள்

ஸ்வீடனின் கடற்கரையோர சிறுநகரில் ஓர் அதிகாலையில் சிறு விமானம் ஒன்று விழுந்து நொறுங்குகிறது. அதற்குச் சில நாட்களுக்குப் பிறகு, தையல் பொருட்களை விற்கும் இரண்டு வயதான பெண்கள் சுட்டுக்கொல்லப்பட்டு, கடையோடு எரிக்கப்படுகிறார்கள். அதற்குப் பிறகு, போதை மருந்து வர்த்தகத்தில் தொடர்புடைய ஒருவர் சுட்டுக்கொல்லப்படுகிறார். இவையெல்லாம் ஒரே காவல் நிலைய வரம்புக்குள் நடக்கிறது.

Swedish crime writer Mankell dies at 67.jpg

என் நாவல்கள் ஸ்வீடனின் பதற்றத்தைப் பற்றியவை: ஹென்னிங் மேன்கல்

கர்ட் வாலண்டர் ஒரு நேர்மையான காவல்துறை அதிகாரி. பல வழக்குகளை மிக அற்புதமாக, துப்பறிந்து குற்றவாளிகளைக் கண்டுபிடித்து சட்டத்தின் முன்பாக நிறுத்தியவர். காக்க காக்க படத்தின் சூர்யா சிலருக்கு நியாபகம் வரலாம். ஆனால், கர்ட் வாலண்டரின் கதையே வேறு. 40ஐத் தாண்டியவர். விவாகரத்து. பெண் அம்மாவுடன் வசிக்கிறாள். தந்தை இருக்கிறார். ஆனால் தனியே. மனிதருக்கு காவல்துறை வேலை மட்டுமே ஒரே ஆறுதல்.

இத்தனை பிரச்சனைகளுக்கு நடுவில் இந்த வழக்கை விசாரிக்க ஆரம்பிக்கிறார் கர்ட் வாலண்டர். மெதுமெதுவாக சக அதிகாரிகளுடன் சேர்ந்து புலனாய்வு செய்கிறார். இதற்கு நடுவில் வாலண்டரின் தந்தை எகிப்திற்குப் போய் பிரமிடுகளைப் பார்க்கப்போகிறேன் என்று செல்கிறார். இருக்கும் பிரச்சனைகள் போதாதென்று, வாலண்டரின் தந்தையை கெய்ரோவில் கைதுசெய்துவிடுகிறார்கள்.

9781784702540_Z.jpg

தி பிரமிட், பல சிறுகதைகளையும் குறுநாவல்களையும் உள்ளடக்கியது

இது தி பிரமிட் குறுநாவலின் கதை. எழுதியவர் ஸ்வீடனைச் சேர்ந்த ஹென்னிங் மேன்கல். துப்பறியும் கதைகள் பிடிக்கும் என்றால் நிச்சயம் படிக்க வேண்டிய ஒரு எழுத்தாளர். ஆனால், உண்மையில் மேன்கல் எழுதுவது, துப்பறிதலைப் பற்றியல்ல. ஸ்வீடனில் நிலவும் பதற்றத்தைப் பற்றி. அங்கு எல்லோருக்கும் பதற்றம் இருக்கிறது. தனிமை குறித்த பதற்றம். வாலண்டருக்கு, அவரது தந்தைக்கு, உடன் பணியாற்றுபவர்களுக்கு என எல்லோருக்கும் இந்தப் பதற்றம் இருக்கிறது. வயதான காலத்தில் என்ன செய்யப் போகிறோம் என்ற பதற்றம். அவற்றைத்தான் மேன்கலின் க்ரைம் நாவல்கள் பிரதிபலிக்கின்றன.

Wallander.jpg

கர்ட் வாலாண்டராக கென்னத் ப்ரனா

இந்தப் பதற்றம் ஸ்வீடன் முழுக்கவே இருக்கிறது எனக் கருதுகிறார் மேன்கல். இவருடைய எல்லாக் கதைகளின் அடி நாதமாக இருப்பது இந்தப் பதற்றம்தான்.

மேன்கல் ஒருவகையில் ஸ்காண்டிநேவிய நாடுகளில் நிலவும் ஒரு பொதுவான போக்கின் பிரதிநிதி. ஐஸ்லாண்டிக்கில் எழுதும் Arnaldur Indriðason போன்றவர்கள் இந்த வகையைச் சேர்ந்தவர்களே. அதாவது, க்ரைம் நாவல்களின் வழியே தாங்கள் சார்ந்த சமூகம் எதிர்கொள்ளும் பிரச்சனைகளை விவரிப்பது.

அல்பாசினோ நடித்த இன்சோம்னியா படத்தின் நாயகனை மனதில் கொள்ளுங்கள். அவர்தான் இந்த Nordic Noir கதைகளின் நாயகன்.

இந்த சோக சமாச்சாரமெல்லாம் எனக்கு வேண்டாம்; ஐ வான்ட் ஒன்லி கொலை, தேடல், அரஸ்ட் என்பவர்களையும் இவர்களது எழுத்து வசீகரிக்கும். எங்கேயோ, ஸ்வீடனிலும் ஐஸ்லாண்டிலும் இருப்பவர்களின் பிரச்சனைகளோடு, உங்கள் பிரச்சனைகளையும் அடையாளப்படுத்திக்கொள்வீர்கள். முதலில் மேன்கலின் Faceless Killersல் இருந்து துவங்குங்கள்.

ஒரு புதிய சுவையைப் பழகிக் கொள்வீர்கள். எளிய ஆங்கிலம், ஏகப்பட்ட கொலைகள் – வேறென்ன வேண்டும் ஒரு வாசகனுக்கு?

Advertisements
Posted in Uncategorized | 4 Comments

சட்டையில் ஒரு ரத்தக் கறை

murder_maarten_van_damme_flickr

ஒரு கொலையில் சம்பந்தப்படுவதாக குற்றம்சாட்டப்படுபவர்கள், அதிலிருந்து விடுவிக்கப்பட அலிபியை நிரூபிப்பதுரொம்பவுமே கடினமான காரியம்.

நான் 9ஆம் வகுப்பு படிக்கும்போது ஒரு நாள். பிடி வாத்தியாரான வேல் முருகன், எங்கள் வகுப்பில் இருந்த எல்லோரையும் மைதானத்தில் உட்காரவைத்து பேச ஆரம்பித்தார்.

“பசங்களா, போன வாரம் செவ்வாய்க் கிழமை காலையில் 3வது பாடவேளை பி.டி தானே. அந்த வகுப்பு நான்தானே எடுத்தேன்” என்றார்.

செவ்வாய்க்கிழமை காலை 3வது பாடவேளை பிடி என்பது சரிதான். அதைக் கேட்கவா இவ்வளவு பேரை கூட்டி உட்கார வைத்திருக்கிறார் வேல்முருகன்?

“இங்க பாருங்கப்பா.. உங்கல்ல யாரையாவது நான் அடிச்சிருக்கேனா? திட்டியாவது பேசியிருக்கேனா?” என்று உருக்கமாகக் கேட்டார் வேல் முருகன்.

“இப்படியிருக்கும்போது, போனவாரம் நான் உங்களுக்கு வகுப்பெடுத்துக்கொண்டிருந்த நேரத்தில், ஸ்ரீ வில்லிபுத்தூரில் ஒரு கொலை நடந்திருக்கு. எங்க மாமாவை யாரோ வெட்டிக் கொன்னுட்டாங்க. அந்தக் கொலையை நான்தான் பண்ணுணதா போலீஸ் சந்தேகப்படுது. என்னைப் பார்த்தா கொலை பண்றவன் மாதிரியா இருக்கு” என்றார் வேல்முருகன்.

“அதனால், போலீஸ் வந்து கேட்டா அன்னை நான் வகுப்பு எடுத்தேன்கிறத மட்டும் சொல்லுங்க, அது போதும்” என்றார் அவர்.

இவ்வளவு நல்லவருக்கா இப்படி ஒரு சோதனை என்று மாணவர்கள் எல்லோரும் அதிர்ச்சியடைந்தார்கள். தவிர, ஒரு கொலை வழக்கில் சாட்சியாவது குறித்து பரவசம் வேறு ஏற்பட்டது. “கண்டிப்பாகச் சொல்கிறோம் சார்” என்று எல்லோரும் வாக்குறுதியளித்தார்கள்.

ஆனால், உண்மையில் அந்த செவ்வாய்க் கிழமை காலையில் அவர் எங்களுக்கு வகுப்பெடுக்கவில்லை. அதனால், அவர்தான் கொலைகாரர் என்று சொல்லிவிட முடியுமா?காரணம், பொதுவாகவே அவர் தன் வகுப்புகளை ஒழுங்காக எடுக்கும் ஆசிரியரல்ல என்பதுதான்.

அந்தக் குறிப்பிட்ட செவ்வாய்க் கிழமை பி.டி. வகுப்பு நேரத்தில் நானும் என் நண்பர்கள் இருவரும் பள்ளியைவிட்டே வெளியேறி சுற்றிவிட்டு, அடுத்த வகுப்பு துவங்கும் நேரத்தில்தான் மீண்டும் பள்ளிக்குள் வந்தோம்.

அதனால், எங்கள் மூன்று பேருக்கு வேல் முருகன் மீது சந்தேகம் இருந்துகொண்டே இருந்தது. அதிலிருந்து நாங்கள் மூவர் மட்டும், வேல் முருகனை “கொலைகாரர்” என்றே எங்களுக்குள் அழைத்துவந்தோம்.

இதில் ஒருத்தன் வேறு, “டேய், வேல் முருகன் சட்டையில் ரத்தக் கறை இன்னும் இருக்குடா” என்பது போல புதிது புதிதாக வதந்திகளைக் கிளப்பிக் கொண்டிருந்தான்.

ஆனால், நாங்கள் இதை ரொம்பவும் ரகசியமாக வைத்திருந்தோம். வேல்முருகன் காதில் விழுந்து, இன்னும் மூன்று கொலைகளை செய்துவிட்டால் என்ன செய்வது?

Posted in Uncategorized | Leave a comment

சந்திரஹாசம்: சித்திரங்களில் ஒரு காலப் பயணம்

s_s_vasan 12 chandrahasamநவம்பர் மாத இறுதியிலேயே சந்திரஹாசம் கைக்குக் கிடைத்துவிட்டது. டிசம்பர் 1ஆம் தேதி இரவில் படித்தும் முடித்துவிட்டேன். பகலிலும் இரவிலும் மழை பின்னி எடுத்துக்கொண்டிருந்தது. அப்போதே அதிகாலை 1 மணியாகிவிட்டதால் காலையில் இதைப் பற்றி எழுதலாம் என்று புத்தகத்தை வைத்துவிட்டு தூங்கப்போனேன். 2ஆம் தேதி என்ன நடந்தது என்பது வரலாறு :(.

மாலிக் காபூர் மதுரையைத் தாக்கியதுபோல ஆகிவிட்டது வீடு. அதிலிருந்து மீண்டெழுந்து இதைப்பற்றி மீண்டும் எழுவதற்குள் ஒரு மாதம் ஓடிவிட்டது.

120814மதுரை, காமிக்ஸ், சு. வெங்கடேசன் என மனதுக்குப் பிரியமான பல அம்சங்கள் ஒன்று சேர்ந்த சந்திரஹாசத்தின் கதை இலங்கையில் துவங்குகிறது.

இலங்கைக்கு படையெடுத்துச் செல்லும் பாண்டிய நாட்டை ஆண்ட மாற வர்மன் குலசேகர பாண்டியன், தன் மகன் வீர பாண்டியனின் வியூகத்தால் இலங்கையை வென்று புத்தரின் புனிதப் பல்லை மதுரைக்குக் கொண்டுவருகிறான். பிறகு, மீண்டும் அந்தப் பல் இலங்கைக்குத் திரும்புகிறது. குலசேகர பாண்டியனின் இரண்டாவது மனைவியின் மகனான வீரபாண்டியனுக்குப் பட்டம் சூட்டப்படுவதால் ஆத்திரமடையும் முதல் மனைவியின் மகனான சுந்தர பாண்டியன் மதுரையை மீட்க மாலிக் காபூரை அழைத்துவருகிறான் என்பதோடு இந்தப் புத்தகம் முடிகிறது.

3இதற்கு நடுவில் குப்ளாய்கானின் அரசவையிலிருந்து மார்கோபோலோ மதுரைக்கு வந்து போகிறார்.

சட்டென 800 ஆண்டுகளுக்கு முந்தைய மதுரைக்குக் கூட்டிச்செல்கிறது இந்தப் புத்தகம். 800 ஆண்டுகளுக்கு முந்தைய அந்நகரின் வளமை, வடிவமைப்பு, நாகரீகம், அரச குடும்பத்துப் பகை, சதி என வார்த்தைகளும் சித்திரங்களும் விரிய விரிய கால எந்திரத்தில் நம் பயணம் துவங்குகிறது.

12189155_1023143281085327_7547467461593145804_n

இதை ஒரு காமிக்ஸ் என்று சொல்வதைவிட, ஆல்பம் என்ற வகையில் சேர்ப்பதுதான் பொறுத்தமாக இருக்கும் என்று நினைக்கிறேன்.

இந்தப் புத்தகத்தில் சொல்லப்படும் கதையைத் தெரிந்துகொள்வதைவிட அந்தச் சித்தரங்களைப் பார்ப்பதே பேரின்பத்தைத் தருகிறது.

CRHHrMiUAAAILHRஇலங்கையின் பராக்கிரமபாகுவுக்கும் பாண்டிய மன்னனுக்கும் நடக்கும் யுத்தம், மதுரையில் பொக்கிஷங்கள், கோபுரத்தில் இருந்து பார்க்கும்போது தெரியும் மதுரை, மாலிக் காபூரின் படை, பெண்கள் அணிந்திருக்கும் ஆபரணங்கள் உச்சகட்டமாக சந்திரஹாசம் என்ற அந்த வாள் – இவையெல்லாமே ஒரு விஷுவல் ட்ரீட்.

9காமிக்ஸ்களைப் பொறுத்தவரை, சித்திரங்களுக்கே முதலிடம். வார்த்தைகள் இரண்டாம் பட்சமதான். ஆனால், இந்தக் கதையில் சு.வெங்கடசேனின் வார்த்தைகள் அவ்வளவு எளிதில் மறக்க முடியாதவை.

downloadஇந்தப் புத்தகத்தின் முக்கியத்துவம் என்பது, தமிழில் உருவாக்கப்பட்ட, தமிழ் மண்ணின் வரலாற்றைச் சொல்லும் கதை என்பதைத் தாண்டியும் நிற்கிறது. வெவ்வேறு வரலாற்றுப் புள்ளிகளைத் தொட்டுச்செல்லும் சந்திரஹாசம், காலப்பயணத்தில் ஒரு நிறுத்தத்தில் இப்போது நம்மைை நிறுத்திவைத்திருக்கிறது. இதன் இரண்டாம் பாகமான மதுரா வியூகம் வரும்போது அந்தப் பயணம் மீண்டும் தொடரும். அதில் மாலிக் காபூரின் அழிவுத் தாண்டவத்தை, அவன் மதுரையைச் சிதைப்பதைக் காண வேண்டியிருக்கும் என்றாலும் அந்தப் பயணத்துக்காக மனம் ஏங்குகிறது.

உங்களுக்கு மதுரை நகர வரலாற்றில் ஈடுபாடு இல்லாமலிருக்கலாம்; காமிக்ஸ் மீது காதல் இல்லாமல் இருக்கலாம்; சு. வெங்கடேசனின் எழுத்துக்களை இதற்கு முன்பு படிக்காமல் இருந்திருக்கலாம். இவை எல்லாவற்றுக்கும் ஒரு இனிய, மறக்க முடியாத துவக்கமாக சந்திரஹாசம் இருக்கும்.

Image | Posted on by | Tagged , , | 2 Comments

ஒரு பாடலின் சரிதம்

பல நாட்களுக்குப் பிறகு மீண்டும் முனியாண்டியின் ஞாபகம். அவர் மனைவியோடு சண்டையிட்டு ஒரு பாட்டுப்பாடுவார் என்று ஒரு பதிவு. ஞாபகமிருக்கிறதா?

மனைவியுடன் சண்டையிட்டு அவர் பாடும் பாடல் இதுதான்:

“திடுமாடு நெடுமுருகா,

நித்தம் நித்தம் இந்த இழவா,

வாத்தியாரு சாவாரா,

வயித்தெறிச்சல் தீராதா?

ஏண்டி, சாம்பார் வச்சே என்னைக் கொல்லப் பாக்குறீங்களா?” என்று அவர் தன் பாட்டை முடிப்பார்.

இப்படி ஒரு பாடலை முனியாண்டி எப்படி இயற்றினார் என்ற சந்தேகம் வெகுநாட்களாகவே இருந்தது.

சமீபத்தில் முடிவடைந்த சென்னை புத்தக சங்கமத்தில், மேடையில் பழ. கருப்பையா பேசிக்கொண்டிருந்தார். தன்னுடைய பள்ளிக்கூட நாட்களில் பிரபலமாக இருந்த ஒரு பாடலை அவர் விளக்கிக்கொண்டிருந்தார். தங்கள் பள்ளி ஆசிரியர்கள் மீது கடுப்பிலிருக்கும் மாணவர்கள், அந்த நாட்களில் ஒரு பாடலைப் பாடுவார்களாம்.

அந்தப் பாடல்:

நெடுமால் திருமருகா,

நித்தம் நித்தம் இந்த இழவா,

ஏடு கிழியாதா, எழுத்தாணி முறியாதா

வாத்தியாரு சாகாரா

வயித்தெரிச்சல் தீராதா?

முனியாண்டியும் பழ. கருப்பையா காலத்து ஆள்தான் என்பதால், இந்தப் பாடல்தான் பிரபலமாகி, முனியாண்டி வசம் வந்து சேர்ந்திருக்கிறது.

Posted in நம்ம பயலுக | Leave a comment

கலைடாஸ்கோப்

images

மீனாட்சி அம்மன் கோவிலுக்கு
வரும் சிறுவர்கள்
பெற்றோரிடம்
அடம்பிடித்து,

கோவில் கடைகளில் விற்கும்
கலைடாஸ்கோப்பை கண்ணில் பொருத்தி,
வர்ண ஜாலங்களைப் பார்த்து
மிரள்கிறார்கள்.
ஏதோ ஒரு சிறுவன்,
ஏதோ ஒரு கலைடாஸ்கோப்பை
கண்ணில் வைத்து, பார்வையைச்
செலுத்தும்போது
வண்ணச் சிதறல்களாய்
விரிகிறது எனது பால்யம்.

Posted in நவகவிதை | Tagged | Leave a comment

கார்ப்பரேட் யுத்தம்

நடுத்தெருவின் நடுப்பகுதியில் இருந்த இருவர் கடைக்கும் இடையிலான இடைவெளி 20 அடிகள்தான் இருக்கும். இருவரும் சாயங்காலம் கடை வைப்பார்கள். கிஇதில் செவநாயியின் கடைக்குத்தான் அதிக கூட்டம் வரும். இதனால், கூட்டத்தைக் கவர்வதற்காக செவநாயி கடையைத் துவக்குவதற்கு முன்பே கிருஷ்ணம்மாள் கடையை போடுவார். இருந்தும் செவநாயி கடையைத் திறந்துவிட்டால் கூட்டம் அங்கே போய்விடும். செவநாயி கடையைச் சுற்றி எப்போதும் 5 பேர் சட்டியோடு உட்கார்ந்திருப்பார்கள். கிருஷ்ம்மாளிடம் இருவர் இருந்தால் அதிகம். இருவரும் விதவைகள். இருவருக்கும் காப்பாற்றியாக வேண்டிய குழந்தைகளோ, பேத்திகளோ இருந்தனர்.  இருவரும் நடுவயதைத் தாண்டியவர்கள். கிருஷ்ணம்மாளைக் கிழவி என்றே சொல்லலாம்.
செவநாயி very strict. ஒரு பஜ்ஜியின் விலை ஐந்து பைசா. ஐம்பது பைசாவைக் கொடுத்து பத்து பஜ்ஜி கேட்டால் உடனே கொடுத்துவிட மாட்டார். 8 பஜ்ஜியும் 2 வடையும் வாங்கிக்கொள்ள வேண்டும். புதியவராக இருந்தால் 6- 4 விகிதாசாரம். போனவுடன் நம்மைக் கண்டுகொள்ள மாட்டார். 25 காசுக்கு பஜ்ஜி என்று கேட்டால், ஆளுக நிக்கிது.. கொஞ்ச நேரம் ஆகும் என்று முகத்தைப் பார்க்காமல் சொல்வார். கிருஷ்ணம்மாளின் கூட்டமில்லாத கடை நம்மை ஈர்க்கும். ஆனாலும், கௌரவத்திற்காக செவநாயியின் கடையில் எல்லோரும் நின்றுவிடுவார்கள். வெகு சிலர் மட்டும் செவநாயி கடையில் இருக்கும் கூட்டத்தை தூரத்திலேயே பார்த்துவிட்டு, நேரடியாக கிருஷ்ணம்மாள் கடைக்குப் போய் வாங்கிவிடுவார்கள். வாங்கிவிட்டு, செவநாய் கடையைக் கடந்துசெல்லும்போது, “எங்க வாங்குனா என்னா.. ரெண்டும் நல்லாத்தான் இருக்கு.. இங்கமட்டும் என்ன தங்கத்திலயா சுடுறாக” என்று எல்லோரு காதுபடவும் பேசிவிட்டு, செவநாயி சுடும் பஜ்ஜியை ஏக்கத்துடன் பார்த்தபடி செல்வார்கள்.
ஏதோ, செவநாயி மட்டும்தான் ஸ்ட்ரிக்டு; கிருஷ்ணம்மாள் ரொம்ப நல்லவர் என்று நினைக்கக்கூடாது. செவநாயி கடையில் நேரமாகிறது என்று ஆர்டரை கேன்சல் செய்துவிட்டு கிருஷ்ணம்மாள் கடைக்குப் போனால், “ஏன் அவ விரட்டி விட்டுட்டாளா?” என்று தெருவில் போகிறவர் வருகிறவர் காது பட கேட்பார். வேறு அவசர வேலையாக தெருவில் போகிறவர்கள்கூட மெனக்கெட்டு இந்தக் கேள்விக்கு பதில் சொல்வார்கள். “ஆமாக்கா.. அங்க விரட்டிவிட்டா இங்க தானக்கா வரணும்.. சின்னப் பய.. ஆசப்பட்டுட்டான்.. யாருடா நம்ம அழகம்மா பேரனா?.. பஜ்ஜி வாங்க வந்துட்டான்” என்று நம்மை அவமானப் படவைப்பார்கள். இதில் கிருஷ்ணம்மாள் உடனே சந்தோஷப்பட்டுவிட முடியாது. “இங்க வந்து வாங்குற.. ஆத்தாக்காரி அடிக்கப்போறா” என்று ஒரு சின்ன பிட்டை போட்டுவிட்டுப் போவார்கள். கிருஷ்ணம்மாள் சட்டுப்புட்டென்று வடையைப் போட்டு அனுப்பிவிடுவார்.
செவநாயி சுடும் வடைக்கு மட்டும் ஏன் இவ்வளவு மவுசு. சுவையில் சிறிது வேறுபாடு இருந்தது நிஜம். அவர் காட்டும் கிராக்கியும் ஒரு காரணமாக இருக்கலாம். இதில் கவனிக்க வேண்டிய ஒரு விஷயம், கிருஷ்ணம்மாள், செவநாயி இருவரது வீடும் அடுத்தடுத்து இருந்ததுதான்.
ஒரு நாள் காலை செவநாயி எழுந்து பார்த்தபோது, அவரது 18 வயது மகன் வீட்டு உத்தரத்தில் தூக்கில் தொங்கிக் கொண்டிருந்தான். அன்று அவர் வடைக் கடை போடவில்லை. கிருஷ்ணம்மாள் சற்றுத் தயக்கத்திற்குப் பின் கடையைப் போட்டுவிட்டார். அடுத்த ஒரு வாரத்திற்கு கிருஷ்ணம்மாள் கடையில் கூட்டம் பின்னியது. அந்த ஒரு வாரத்தில் கிருஷ்ணம்மாள் என்ன நினைத்திருப்பார்?

P.S: சிவன்ஆயி என்ற பெயரே சிவநாயி.. செவநாயி என்று மாறிவிட்டது என்கிறார்கள் ஆய்வாளர்கள்.

Posted in அனுபவம் | 1 Comment

தமிழ்ச் சமூகமும் என்னத்த கண்ணையாவும்

என்னத்த கண்ணையா வெகு சில படங்களில் மட்டுமே நடித்துவந்தாலும் தமிழ்ச் சமூகத்தின் மீது தனது வசனங்களின் ஊடாக பெரும் தாக்கம் செலுத்திவருகிறார். நேற்று திருவல்லிக்கேணியில் ஒரு தி.மு.க. பொதுக்கூட்டம் நடந்தது. கூட்டம் துவங்குவதற்கு முன்பு பாடல்கள் சிலவற்றை ஒளிபரப்பிக் கொண்டிருந்தனர். அதில் ஒரு பாட்டு வெகுவாகக் கவனத்தைக் கவர்ந்தது. அந்தப் பாட்டின் பல்லவி இதுதான்: “வரும் ஆனா.. வராது..” அதாவது, ஜெயலலிதாவுக்கு கூட்டம் வரும் ஓட்டு வராது என்று போகிறது பாட்டு.
“கள்ளக்குடி கொண்ட கருணாநிதி வாழ்கவே…”, “கற்பூர கனல்வாக்கைக் கலைஞர் சொல்லட்டும்” போன்ற கம்பீரமான பாடல்களுடன் வலம்வந்த தி.மு.க. இன்று ஜெயலலிதாவுக்கு வரும் கூட்டத்தைப் பார்த்து, வரும் ஆனா வராது என்ற நிலைக்கு வந்துவிட்டது.
அதற்காக, வரும் ஆனா வராது என்ற சொற்றொடரை நான் குறைத்து மதிப்பிடுவதாக நினைக்கக்கூடாது. பல அர்த்த அடுக்குகளை உள்ளடக்கிய வாக்கியம் அல்லவா அது?

Posted in சும்மா ஒரு கருத்து | Leave a comment